Voice of Sathyanathan OTT: ദിലീപ്-റാഫി കൂട്ടുകെട്ടിലൊരുങ്ങിയ കോമഡി-ത്രില്ലർ ചിത്രമാണ് ‘വോയ്സ് ഓഫ് സത്യനാഥൻ’. റിംഗ് മാസ്റ്ററിന് ശേഷം ദിലീപും റാഫിയും ഒന്നിക്കുന്ന ഈ ചിത്രം ഇപ്പോൾ ഒടിടിയിൽ റിലീസിനെത്തിയിരിക്കുകയാണ്.
നാക്കുപിഴകൊണ്ട് ജീവിതം തന്നെ പെരുവഴിയിലായ സത്യനാഥന്‍ എന്ന ചെറുപ്പക്കാരന്റെ ജീവിതമാണ് ചിത്രം പറയുന്നത്. വികട സരസ്വതി വിളയാടുന്ന സത്യനാഥന്റെ നാവ് അയാളെ പലവിധ അബദ്ധങ്ങളിൽ കൊണ്ടു ചാടിക്കുകയാണ്. അതോടെ അയാൾ ദേശീയ തലത്തിൽ വരെ ശ്രദ്ധ നേടുന്നു. സത്യനാഥൻ ചെന്നു ചാടുന്ന കുരുക്കുകളുടെയും അതിൽ നിന്നും അയാൾ രക്ഷപ്പെടുന്നത് എങ്ങനെയെന്നുമാണ് ചിത്രം പറയുന്നത്.
വലിയ താരനിര തന്നെ ചിത്രത്തിലുണ്ട്. വീണ നന്ദകുമാറാണ് ചിത്രത്തിലെ നായിക. ജോജു ജോർജ്, അനുപം ഖേർ, മകരന്ദ് ദേശ് പാണ്ഡെ, ജഗപതി ബാബു, അലൻസിയർ ലോപ്പസ്, ജാഫർ സാദ്ദിഖ് (വിക്രം ഫെയിം), സിദ്ദിഖ്, ജോണി ആന്റണി, രമേശ് പിഷാരടി, ജനാർദ്ദനൻ, ബോബൻ സാമുവൽ, ബെന്നി പി നായരമ്പലം തുടങ്ങി നിരവധി അഭിനേതാക്കൾ ‘വോയ്സ് ഓഫ് സത്യനാഥനിൽ ഉണ്ട്.
ജൂലൈ 28 നായിരുന്നു ചിത്രം തിയേറ്ററുകളിൽ എത്തിയത്. ബാദുഷ സിനിമാസിന്റെയും ഗ്രാന്റ് പ്രൊഡക്ഷൻസിന്‍റെയും ബാനറിൽ എൻ എം ബാദുഷ, ഷിനോയ് മാത്യു, ദിലീപ്, രാജൻ ചിറയിൽ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. മനോരമ മാക്സിലും സിംപ്ലി സൗത്ത് എന്ന ഒടിടി പ്ലാറ്റ്ഫോമിലും ചിത്രം കാണാം.
